Францыя абвінавачвае Азербайджан у распальванні беспарадкаў у Новай Каледоніі, заморскай тэрыторыі Францыі ў заходняй частцы Ціхага акіяна.
Кіраўнік французскага МУС не сумняваецца, хто стаіць за ростам напружанасці ў Новай Каледоніі. «Калі гаворка ідзе пра Азербайджан, то гэта не фантастыка, гэта рэальнасць», - сказаў Жэральд Дарманін у інтэрв'ю французскаму грамадскаму тэлебачанню.
Чыноўнік абвінаваціў некаторых лідараў незалежніцкага руху ў заключэнні здзелкі з уладамі ў Баку. «Аднак я хачу сказаць, што, нягледзячы на спробы ўмяшання, ніводная краіна не зможа кіраваць гвалтам у Новай Каледоніі. Францыя — суверэнная», — падкрэсліў кіраўнік МУС.
Эксперты кажуць, што ўмяшанне Азербайджана з'яўляецца помстай за дапамогу Францыі Арменіі, якая гадамі падвяргалася нападам з боку азербайджанскай арміі. У адказ улады ў Баку пачалі актыўна падтрымліваць дэкаланізацыю французскіх заморскіх тэрыторый. Месяц таму Азербайджан падпісаў пагадненне на гэты конт з Кангрэсам Новай Каледоніі.
Некаторыя аглядальнікі, аднак, лічаць, што найбольшую адказнасць за цяперашні крызіс нясе ўрад у Парыжы. Праведзеная ўладамі рэформа выбарчай сістэмы на востраве выклікала найбуйнейшую хвалю беспарадкаў за чатыры дзесяцігоддзі. Пяць чалавек загінулі, у тым ліку двое жандараў, некалькі сотняў мірных жыхароў атрымалі раненні.
ПР/юл